Umsögn Hydros og Sveitarfélagsins Ölfuss í samráðsgátt um drög að lögum um stjórn vatnamála

Frumvarpið hefur það að markmiði að styrkja vernd vatnsauðlindarinnar, koma í veg fyrir hnignun vatnshlota og tryggja sjálfbæra nýtingu yfirborðs- og grunnvatns. Í umsögninni er sérstaklega fjallað um áhrif lagasetningarinnar á landeldi í Ölfusi, sem hefur á undanförnum árum orðið mikilvægur þáttur í atvinnuuppbyggingu sveitarfélagsins.

Helstu áherslur umsagnarinnar eru meðal annars:

• Stuðningur við heildstæðan lagaramma
  Hydros og Sveitarfélagið Ölfus fagna setningu rammalaga um vatnamál og leggja áherslu á mikilvægi vatnsauðlindarinnar sem undirstöðu sjálfbærrar atvinnuuppbyggingar, þar á meðal landeldis.

• Sérstaða lokaðra/stýrðra landeldiskerfa
  Áréttað er að landeldi í Ölfusi fer fram í lokuðum, tæknilega stýrðum kerfum með stöðugri vöktun vatnsnotkunar og vatnsgæða. Beiting laganna þarf að taka mið af þessari sérstöðu og vera í samræmi við sérlög, svo sem lög um lagareldi.

• Raunveruleg og mælanleg áhrif sem grundvöllur mats
  Við mat á mögulegri hnignun vatnshlota er lögð áhersla á að byggt sé á raunverulegum, mælanlegum áhrifum en ekki einungis almennum forsendum eða flokkun starfsemi.

• Meðalhóf og fyrirsjáanleiki í leyfisveitingum og vöktun
  Endurskoðun eða breyting leyfa skal vera stigskipt, byggð á gögnum og í samræmi við meðalhófsreglu, þar sem vægari úrræði eru nýtt áður en til íþyngjandi aðgerða kemur.

• Samræmi við skipulag og byggðasjónarmið
  Við samræmingu vatnaáætlana og skipulagsáætlana sveitarfélaga er mikilvægt að taka tillit til þegar heimilaðrar starfsemi, fjárfestinga sem þegar hefur verið ráðist í og byggðahagsmuna.

Í niðurstöðu umsagnarinnar er lögð áhersla á að lög um stjórn vatnamála geti orðið öflugt tæki til verndar vatnsauðlindinni, að því gefnu að beiting þeirra sé hlutlæg, í samræmi við sérlög og tryggi jafnvægi milli umhverfisverndar, atvinnuuppbyggingar og fjárfestingaröryggis.

Umsögnina má nálgast í samráðsgátt stjórnvalda:
https://samradsgatt.island.is